दाङ। अर्घाखाँची शीतगंगा नगरपालिका–१२ हिलेखोलामा छत्रदेवबाट बुटवलतर्फ जाँदै गरेको लु १ ज ७४६३ नम्बरको जीप दुर्घटना हुँदा एक जनाको घटनास्थलमै मृत्यु भएको छ। दुर्घटनामा ९ जना घाइते भएका छन्।
मृत्यु हुनेमा अन्दाजी ६५ वर्षका रामप्रसाद पन्थी रहेको र मृतकको ठेगाना खुल्न नसकेको इलाका प्रहरी कार्यालय ठाडाका प्रहरी निरीक्षक रवीन्द्र चन्दले बताए।
घाइते ९ जनालाई प्राथमिक स्वास्थ्य केन्द्र ठाडामा उपचारपछि थप उपचारका लागि लुम्बिनी प्रादेशिक अस्पताल बुटवलमा रेफर गरिएको उनले बताए।
जीप सडक देखि ७० मिटर तल खसेको छ। जीप चालक चुराबहादुर खत्री घाइते भएका छन्। उनलाई उपचारका लागि बुटवल पठाइएको छ।
जीपको ब्रेक फेल भएर दुर्घटना हुन सक्ने अनुमान गरिएको छ। दुर्घटनाको थप अनुसन्धान भइरहेको प्रहरीले जनाएको छ।
