काठमाडौं। वेस्ट इन्डिजका अलराउन्डर ड्वेन ब्राभोले सबैखाले क्रिकेटबाट सन्न्यास लिएका छन् । चोटका कारण ब्राभोले फ्रेन्चाइज क्रिकेट ‘क्यारेबियन प्रिमियर लिग’ (सीपीएल) चलिरहँदै सन्न्यासको घोषणा गरेका हुन् । उनले आफ्नो दिमागले अझै क्रिकेट खेल्न चाहेको तर शरीरले अनुमति नदिइरहेको बताएका छन् ।
ड्वेन ब्राभो टी–२० क्रिकेटमा सबैभन्दा धेरै विकेट लिने बलर हुन् । उनले ५ सय ८२ टी–२० क्रिकेटमा ६ सय ३१ विकेट लिएका छन् । ब्राभोले आफ्नो १८ वर्षको खेल जीवनमा वेस्ट इन्डिजबाट ४० टेस्ट, १ सय ६४ एकदिवसीय अन्तर्राष्ट्रिय र ९१ टी–२० अन्तर्राष्ट्रिय क्रिकेट खेल्दै ३ सय ६३ विकेट लिएका छन् । यस्तै उनले यी सबै फर्म्याटमा गरी पाँच शतक र २७ अर्धशतकसहित ६ हजार ३ सय २३ रन बनाएका छन् ।
ब्राभोले इन्डियन प्रिमियर लिग (आईपीएल) सहित विश्वका चर्चित फ्रेन्चाइज लिग पनि खेलेका छन् । उनले सन् २०२१ मा अन्तर्राष्ट्रिय क्रिकेटबाट सन्न्यास लिएका थिए ।
