धादिङ। पृथ्वी राजमार्गस्थित कृष्णभीरबाट आइतबार बिहान त्रिशूली नदीमा ग्याँस बोकेको बुलेट खस्दा बेपत्ता भएका चालक सामान्य घाइते भएको अवस्थामा सम्पर्कमा आएका छन् । चितवनबाट काठमाडौंतर्फ ग्याँस बोकेर जाँदै गरेको एनएल–०२एल ३९०७ नम्बरको ग्याँस बोकेको भारतीय गाडी त्रिशूली नदीमा खसेको थियो ।

चितवनबाट काठमाडौंतर्फ आउँदै गरेको ग्याँस बुलेट तीव्र गतिका कारण अनियन्त्रित भई सडकबाट करिब ६० मिटर तल त्रिशूली नदीमा खसेको थियो । बुलेटका सहचालक भने अझै बेपत्ता छन् । बेपत्ता खोज्न सशस्त्र प्रहरी बल नेपाल विपद् व्यवस्थापन तालिम शिक्षालय कुरिनटार र विपद् व्यवस्थापन बेस आदमघाटबाट सशस्त्र प्रहरी नायब उपरीक्षक अश्विनकुमार गुरुङको कमान्डमा गोताखोर सहित विपद् व्यवस्थापन तालिम प्राप्त सुरक्षा फौज परिचालन गरिएको छ ।

गाडीको अघिल्लो भाग भीरमा अड्किएको भए पनि ग्याँस बोक्ने पछाडिको भाग (बुलेट) भने त्रिशूली नदीमा खसेको थियो । दुर्घटनाको खबर पाएर घटनास्थलमा पुगेको प्रहरीले बुलेबाट ग्याँस लिक भएको बताएको छ । नदीको बीचमा भएको बुलेटबाट लिक भइरहेको ग्याँस सकिन दुई दिनभन्दा बढी लाग्ने जानकारहरूलाई उद्धृत गर्दे घटनास्थलमा रहेका इलाका प्रहरी कार्यालय गजुरीले जनाएको छ ।

घटनास्थल आसपासमा बस्ती नभएका कारण थप जोखिम नदेखिएको भए पनि सतर्कता अपनाउन प्रहरी परिचालन भइरहेको धादिङका प्रमुख जिल्ला अधिकारी सुमन घिमिरेले बताए । ग्याँस बुलेट बगाएर दुर्घटनास्थलबाट ५० मिटर परसम्म पुगेको छ ।