काठमाडौं। नेपाल आईसीसी विश्वकप लिग–२ त्रिकोणात्मक सिरिजमा घरेलु टोली क्यानडासँग खराब ब्याटिङ गर्दै १०३ रनले पराजित भएको छ। नेपालको ओडीआईमा क्यानडासँग यो पहिलो हार हो ।

२५४ रनको लक्ष्य पछ्याएको नेपाल ४०.१ ओभरमा १५० रनमा अल आउट भयो। नेपालका करण केसीले २४ बलमा २ चौका र २ छक्कासहित सर्वाधिक २७ रन बनाए।

ओपनर कुशल भुर्तेल १, आसिफ शेख २०, भीम सार्की १८, रोहित पौडेल ५, कुशल मल्ल १२, दीपेन्द्रसिंह ऐरी ८, सोमपाल कामी ६, सन्दीप लामिछाने २२ र गुल्सन झा १५ रनमा आउट भए। क्यानडाका तीव्र गतिका बलर डिलोन हेलिगरले १० ओभरमा ३१ रन खर्चेर ५ विकेट लिए। अखिल कुमार र अंश पटेलले २–२ विकेट लिए। सादविन जाफरले १ विकेट लिए।

त्यसअघि किंग सिटीमा रहेको मप्ले लेआफ नर्थ वेस्ट क्रिकट ग्राउण्डमा टस हारेर पहिला ब्याटिङको निम्तो पाएको क्यानडाले ५० ओभरमा ८ विकेट गुमाउँदै २५३ रन बनाएको थियो। एक समय ४० ओेभरमा १४९–५ को अवस्थामा रहेको क्यानडाले अन्तिम १० ओभरमा १०४ रन जोड्दै बलियो योगफलमा पुगेको थियो।

कप्तान निकोलस किर्टोनले ४४ बलमा ३ चौका र ६ छक्कासहित ७३ रनको अविजित इनिङ खेले। नेपालका सोमपाल कामी र ललित राजवंशीले २–२ विकेट लिए।

सन्दीप लामिछाने, गुल्सन झा र रोहित पौडेलले १–१ विकेट लिए। नेपालले बुधबार ओमानसँग खेल्नेछ। नेपाल लिग २ मा ५ खेलमा २ अंकका साथ सातौँ स्थानमा छ। क्यानडा भने ९ खेलमा १० अंकका साथ दोस्रो स्थानमा पुगेको छ। नेदरल्याण्ड्स ८ खेलमा १२ अंकका साथ शीर्ष स्थानमा छ।