काठमाडौं। देशभर मनसुन सक्रिय भएसँगै पूर्वी र मध्य तराईमा भारी वर्षा भएको छ। बंगालको खाडीबाट प्रवेश गरेको उच्च जलवाष्पयुक्त वायुका कारण देशभर मनसुन सक्रिय भएको हो।
यो क्रम आइतबारसम्मै रहनेछ। अहिले काठमाडौं उपत्यकासहित देशभर सघन वर्षा भइरहेको छ। पूर्वी र मध्य तराईमा भनेर धेरै भारी वर्षा भएको छ।
कोशी प्रदेशका झापा, मोरङ, इलाममा वर्षाले जनजीवन प्रभावित तुल्याएको छ। तटीय क्षेत्रमा डुबान र कटानको समस्या निम्त्याउन सक्ने मौसमविद्ले बताएका छन्।
पछिल्लो २४ घण्टामा झापाको केचनामा १८७.२, चन्द्रगढी विमानस्थलमा १८३.२, अनारमनीमा १५८.६ मिलिमिटर वर्षा भएको छ।
इलामको कन्काईमा १७४.८, मोरङको बाहुनीमा १४९, विराटनगर विमानस्थलमा १८९.२, सप्तरीको बरमझियामा १८२.४, उदयपुरको सुन्दरपुरमा १४६.८, सप्तरीको रुपनी बजारमा १४६.२ मिलिमिटर वर्षा भइरहेको छ।
अहिले पूर्वी र मध्य तराईमा बढी वर्षा भइरहेकाले बादल गहिरिँदै गइरहेको त्रिभुवन विश्वविद्यालय जल तथा मौसम विज्ञानका सहप्राध्यापक विनोद पोखरेलले बताए। उनले वर्षा अझै बढ्न सक्ने बताए। मौसमविद्का अनुसार शनिबार रातिबाट मात्रै वर्षा मत्थर हुने देखिन्छ।
शुक्रबार देशका अधिकांश भूभागमा भारी वर्षाको सम्भावना छ। आज र भोलि रात्रि बस नचलाउन सरकारले आग्रह गरेको छ।
सम्बन्धित समाचार
लोकप्रिय समाचार
