दोलखा। शुक्रबार र शनिबारको अविरल वर्षासँगै खसेको पहिरोमा परेर माथिल्लो तामाकोशी जलविद्युत आयोजना कार्यरत दुईजना सुरक्षाकर्मी सहित ४ जना बेपत्ता भएका छन् ।
बिगु गाउँपालिका–१ लामाबगरस्थित ४५६ मेगावाटको माथिल्लो तामाकोशी जलविद्युत आयोजनास्थलको संरचनाका लागि रहेको हेडवक्र्स नियन्त्रण कक्ष रहेको भवनमा पहिरो खस्दा नेपाली सेनाका दुईजना र अन्य दुई कर्मचारी गरि चारजना बेपत्ता भएको आयोजनाले जनाएको छ।
पहिरोले ड्याम नजिकै रहेको हाइड्रोपावरको कन्ट्रोल बिल्डिङमा माथिबाट पहिरो झरेर बिल्डिङ पुरिँदा त्यहाँ बस्ने सुरक्षार्कीसहित ४ जना बेपत्ता भएका हुन् । बेपत्ता हुनेमा नवलपरासीका ३५ वर्षीय कृष्णप्रसाद चौधरी, बिगु गाउँपालिका– १ लामाबगरका ३० वर्षीय जयराम तामाङ, नेपाली सेनाका जवान नरेन्द्र बहादुर पाल र शंकर चन्द रहेका छन्।
उनीहरूको खोजी भइरहेको जिल्ला प्रहरी कार्यालय दोलखाले जनाएको छ । पहिरोले सडक अवरुद्ध हुँदा खोजी कार्यमा समस्या भएको प्रहरीले जनाएको छ। पहिरोले आयोजनामा समेत ठूलो क्षति गरेको छ।
