काठमाडौं। माओवादी केन्द्रका अध्यक्ष पुष्पकमल दाहाल प्रचण्डले देशलाई दुई दलीय शासन अधिनायकवाद तर्फ लैजाने खोजिएको भन्दै अब त्यसविरुद्ध विपक्षीहरूलाई समेटेर लैजानुपर्ने बताएका छन्।
बुधबार पार्टीको अनुशासन आयोग, निर्वाचन आयोग र लेखा आयोगको संयुक्त बैठक समापनको क्रममा बोल्दै अध्यक्ष दाहालले सबै प्रतिपक्षलाई समेटेर लैजानुपर्ने बताएको पार्टीका प्रवक्ता अग्निप्रसाद सापकोटाले जानकारी दिए।
‘सबै प्रतिपक्षलाई समाहित गर्दै संसद्मा भएको हाम्रो शक्तिलाई पनि प्रभावकारी बनाउने । त्यसको साथसाथै अन्य फोरमहरूमा पनि सरकारको जनविरोधी क्रियाकलापहरू, भ्रष्टाचार विरोधी अभियान रोकिएको छ, छोपछाप पार्न लागिरहेको छ। लोकतान्त्रिक मूल्य, मान्यता, आदर्श पनि कमजोर हुँदै गइराखेको छ। दुई दलीय शासनतिर देशलाई लान खोजिएको छ। त्यसले अधिनायकवादतिर लाने सङ्केत देखा परेको छ। पश्चगमनतिर जान खोजेको छ। त्यसलाई रोक्नका लागि जनतालाई सुसूचित गर्नुपर्छ। प्रशिक्षित गर्नुपर्छ। पार्टी एकताबद्ध भएर अगाडि बढ्नुपर्छ भन्ने निर्णय भएको छ,’ दाहाललाई उदृत गर्दै प्रवक्ता सापकोटाले भने।
अध्यक्ष दाहालले भूराजनीतिक स्थितिले गर्दा राष्ट्रियताको सवाल धेरै संवेदनशील भएको बताएका थिए। सञ्चारकर्मीको प्रश्नको जवाफ दिँदै प्रवक्ता सापकोटाले प्रधानमन्त्री केपी शर्मा ओलीले जनयुद्धलाई हिंसा भन्नु संविधान विपरीत भएको बताए। प्रधानमन्त्रीले बृहत् शान्ति सम्झौताको विपरीत बोलेको उनले बताए। नेकपा हुँदा दस्तावेजमै जनयुद्धलाई सशस्त्र सङ्घर्ष लेखिएको भन्दै सो कुरा बिर्सिएर जनयुद्धलाई हिंसा भन्नुमा बदनियत रहेको बताए।
‘उहाँ देशको प्रधानमन्त्री हो। एउटा पार्टीको अध्यक्ष पनि हो। त्यो कुरा बोल्नु सरासर संविधान विपरित छ। सहमति विपरित छ। संविधानमा सशस्त्र सङ्घर्ष भनिएको छ। बृहत् शान्ति सम्झौतामा पनि सशस्त्र सङ्घर्ष भनिएको छ। बाह्र बुँदे समझदारीको विरुद्धमा बोल्नुभएको छ। बृहत् शान्ति सम्झौताको पनि विरुद्धमा बोल्नुभएको छु,’ प्रवक्ता सापकोटाले भने।
