काठमाडौं। नेपालमा कार्यरत २६ वटा नागरिक संस्थाहरु लैंगिक हिंसा अन्त्यका लागि गृहमन्त्री रमेश लेखकलाई ध्यानाकर्षण पत्र बुझाएका छन् । मुलुकमा अहिले पनि घरेलु हिंसाबाट ६५ प्रतिशत महिला प्रताडित भइरहेका भन्दै उनीहरुले यस्ता घटना रोक्नका लागि गृहमन्त्री लेखकलाई १६ बुँदे ध्यानाकर्षण पत्र बुझाएका हुन् ।
’नेपाल प्रहरीको गतवर्षको तथ्यांकलाई आधार मान्ने हो भने ७८ प्रतिशत घरेलु हिंसाको तथ्यांक देखिन्छ,’ ध्यानाकर्षण पत्रमा लेखिएको छ, ’यस्ता हिंसा गर्ने व्यक्तिहरु मध्ये ८३ प्रतिशत जानपहिचानका हुन्छन् । लोकतान्त्रिक मुलुकमा यस्तो तथ्यांक हामी सबैका लागि चिन्ताको विषय हो । राज्यका तर्फबाट यस्ता गम्भीर विषयमा ध्यानाकर्षण गराउन चाहान्छौं ।’
महिलाविरुद्ध हुने यौनजन्य दुर्व्यवहार, बलात्कार, बेचबिखन, हत्या, अपहरण, बालविवाह, एकल महिलामाथि हुने विभेद, मानसिक हिंसा र जातीय विभेदका आधारमा हुने लगायतका हिंसा अन्त्य गर्न तत्काल आवश्यक कदम उठाउन पनि पत्रमा अनुरोध गरिएको छ ।
यस्तै डिजिटल स्पेसले निम्त्याएका हिंसालाई न्यूनीकरण र अन्त्य गर्नका निम्ति विशेष पहल गर्न र हरेक नागरिकको डिजिटल अधिकार, सुरक्षा र गोपनीयता सुनिश्चित गर्नसमेत माग गरिएको छ । यस्तै नागरिक संस्थाहरुले सबै प्रदेश र जिल्ला तहमा साइबर ब्युरोको स्थापना गर्नुपर्ने समेत यी संस्थाले जनाएका छन् ।
यौनजन्य हिंसा, बलात्कार, शोषणबाट प्रभावित महिला, बालबालिका वा कुनै पनि व्यक्तिलाई तत्काल न्याय सुनिश्चित हुने गरी सुरक्षित आवास, पुर्नस्थापना, स्वदेश फिर्ती र जीवनयापनका आधारहरु सुनिश्चित गर्न समेत ध्यानाकर्षण पत्रमा माग गरिएको छ ।
