बैतडी। बैतडीमा बिहीबार राति जीप दुर्घटना हुँदा ६ जना घाइते भएका छन्। दशरथचन्द नगरपालिका–३ डुवापानीमा से १ ज ३२० नम्बरको जीप दुर्घटना भएको हो।

जिल्ला प्रहरी कार्यालय बैतडीका प्रहरी निरीक्षक जनक ढुंगानाका अनुसार दुर्घटनामा ६ जना घाइते भएका छन्।दशरथचन्द नगरपालिका–३ का ४५ वर्षीय दिलीप नाथ, ३९ वर्षीय भानदेव नाथ, ४० वर्षीया अनिता नाथ, ४६ वर्षीय केशव नाथ, १६ वर्षीय सुशील नाथ र जीप चालक दशरथ नाथ घाइते छन्।

जीपमा ८ जना सवार थिए। अन्य २ जना सकुशल छन्। सामान्य घाइते ५ जना जिल्ला अस्पतालमा उपचारपछि राति नै घर फर्किएका थिए। गम्भिर घाइते दिलिप नाथलाई थप उपचारका लागि राति नै धनगढी रेफर गरिएको प्रहरीले जनाएको छ। उनको हात र पिठ्युमा चोट लागेको छ।

दशरथचन्द नगरअन्तर्गत पर्ने छेला दुर्गाभवानी ग्रामीण कच्ची सडकमा जीप अनियन्त्रित भएर सडकबाट तल खसेर दुर्घटना भएको हो।

अनियन्त्रित जीप सडकबाट करिब १० मिटर तल खसेर सल्लाको रूखमा अडकिएको थियो। जीप रूखमा अड्कँदा ठूलो मानवीय क्षति हुनबाट जोगिएको प्रहरीले जनाएको छ।