२०८१ असार ३१ गते | 15th of July 2024

प्रधानमन्त्री प्रचण्डले उद्घाटन गरे हेटौँडा सबस्टेशन

प्रधानमन्त्री प्रचण्डले उद्घाटन गरे हेटौँडा सबस्टेशन
Sanchar_np प्रकाशित: २०८१ असार १ गते १३:३२

काठमाडौं। प्रधानमन्त्री पुष्पकमल दाहाल प्रचण्डले ४०० केभीको हेटौँडा सबस्टेशन उद्घाटन गरेका छन्।

नेपाल विद्युत् प्राधिकरणले आज हेटौँडामा आयोजना गरेको कार्यक्रममा उनले मकवानपुरको हेटौँडा उपमहानगरपालिका–११ थानाभ¥याङमा निर्मित सो सबस्टेशनको उद्घाटन गरेका हुन्।

ग्यास इन्सुलेटेड प्रणाली (जीआइएस) प्रविधिमा आधारित स्वचालित नेपालको तेस्रो ठूलो ४०० केभी हेटौँडा सबस्टेशन निर्माण सम्पन्न गरी गत शुक्रबारदेखि सञ्चालन (चार्ज) मा ल्याइएको छ। यसैगरी नेपाल–भारत विद्युत् प्रसारण तथा व्यापार आयोजनाबाट थानाभ¥याङमा नै २२० र १३२–११ केभी क्षमताका सबस्टेशन निर्माण सम्पन्न गरी गत शुक्रबारदेखि नै चार्ज गरिएका छन्।

मुलुकभित्रको पूर्व–पश्चिम विद्युत् आपूर्तिलाई भरपर्दो तथा गुणस्तरीय बनाउन र भारतसँगको विद्युत् व्यापारका लागि निर्माण गरिएको जीआइएस प्रविधियुक्त स्वचालित ढल्केबर मुलुककै पहिलो, इनरुवा दोस्रो र हेटौँडा तेस्रो ठूलो सबस्टेशन हो।

हेटौँडा सबस्टेशनको निर्माण सम्पन्न भएसँगै करिब चार हजार मेगावाट विद्युत् प्रवाह गर्नसक्ने पूर्वाधार संरचना तयार भएको छ।

हेटौँडा–ढल्केबर–इनरुवा ४०० केभी प्रसारण लाइन आयोजना निर्माण सम्पन्न भएपछि ढल्केबरबाट पूर्व–पश्चिम चार हजार मेगावाट विद्युत् प्रवाह गर्न सकिने हुँदा आन्तरिकरुपमा विद्युत् आपूर्ति थप सुदृढ हुने र भारतसँगको विद्युत् व्यापार थप विस्तार हुनेछ।

अमेरिकी सहायता परियोजना मिलेनियम च्यालेञ्ज कर्पोरेसन (एमसीसी) बाट नुवाकोटको रातमाटेबाट निर्माण हुने ४०० केभीको डबल सर्किट प्रसारण लाइन हेटौँडा सबस्टेशनमा ल्याएर जोडिनेछ। यसका लागि हेटौँडा सबस्टेशनमा आवश्यक पूर्वाधार संरचना निर्माण गरिएको छ। राष्ट्रिय विद्युत् विकास दशक कार्यक्रमअन्तर्गत सरकार र प्राधिकरणको संयुक्त लगानीमा हेटौँडा, ढल्केबर इनरुवा ४०० केभी सबस्टेशन विस्तार आयोजना सुरु गरिएको थियो।

उक्त आयोजनाअन्तर्गतका तीनवटै सबस्टेसन निर्माण सम्पन्न भएका छन्। सरकार तथा प्राधिकरणको लगानी र विश्वबैंकको सहुलियतपूर्ण ऋणमा नेपाल–भारत विद्युत् प्रसारण तथा व्यापार आयोजनाबाट निर्माण गरिएको २२०–१३२–११ केभी हेटौँडा सबस्टेशन निर्माणका लागि २०१८ डिसेम्बरमा ठेक्का सम्झौता भएको थियो। ४००, २२० र १३२ केभी हेटौँडा सबस्टेशनको अनुमानित लागत तीन अर्ब रहेको छ।

प्रतिक्रिया

Leave a Reply

Your email address will not be published. Required fields are marked *

Verified by MonsterInsights