काठमाडौँ ।प्रधानमन्त्री सुशीला कार्कीको सिफारिसमा नियुक्त तीन मन्त्रीले आज पद तथा गोपनीयताको शपथ लिएका छन् ।
राष्ट्रपति रामचन्द्र पौडेलले राष्ट्रपति भवन शीतल निवासमा आयोजित विशेष समारोहमा अर्थमन्त्री रामेश्वर खनाल, ऊर्जा, जलस्रोत तथा सिँचाइ, भौतिक पूर्वाधार तथा यातायात तथा सहरी विकास मन्त्री कुलमान घिसिङ र गृह तथा कानुन, न्याय तथा संसदीय मामिला मन्त्री ओमप्रकाश अर्याललाई शपथ गराउनुभयो । बाँकी मन्त्रालयको कार्यभार प्रधानमन्त्री कार्कीले आफैं सम्हाल्ने भएकी छन् ।
नवनियुक्त मन्त्रीहरूमध्ये खनाल पूर्वअर्थ सचिव हुन्, जसले आर्थिक सुधार र सुशासनका क्षेत्रमा काम गर्दै आएका छन् । घिसिङ नेपाल विद्युत् प्राधिकरणका पूर्वकार्यकारी निर्देशक हुन्, जसले संस्थागत सुधार र ऊर्जा क्षेत्रको व्यवस्थापनमा महत्वपूर्ण योगदान गरेका छन् । अधिवक्ता अर्यालले अख्तियार प्रमुख लोकमानसिंह कार्कीको नियुक्ति चुनौती दिँदै चर्चामा आएका थिए ।
शपथपछि मन्त्रीहरूले आजै सिंहदरबारमा पदबहाली गर्ने कार्यक्रम छ । सो अवसरमा उपराष्ट्रपति रामसहायप्रसाद यादव, प्रधानमन्त्री कार्की, प्रधानन्यायाधीश प्रकाशमानसिंह राउत, राष्ट्रियसभाका अध्यक्ष नारायणप्रसाद दाहाल, पूर्वप्रधानमन्त्री डा. बाबुराम भट्टराई, संवैधानिक निकायका प्रमुख तथा पदाधिकारी, उच्चपदस्थ सरकारी अधिकारी तथा सुरक्षा निकायका प्रमुखहरू उपस्थित थिए ।
‘जेनजी’ आन्दोलनका बीच राष्ट्रपति पौडेलले भदौ २७ गते पूर्वप्रधानन्यायाधीश कार्कीलाई अन्तरिम सरकारको प्रधानमन्त्रीमा नियुक्त गर्नुभएको हो ।
