नेपालको सुदूरपश्चिम प्रदेशको अछाम जिल्लाको मेल्लेख गाउँपालिका–४ मा रहेको श्री बासुकी माध्यमिक विद्यालयको भवन निर्माणका लागि आज मिति २०८३ वैशाख २९ गते भारतीय राजदूतावास, काठमाडौंका प्रथम सचिव श्री नारायण सिंह र मेल्लेख गाउँपालिकाका अध्यक्ष श्री ज्वाला सिं साउँदले संयुक्त रूपमा शिलान्यास गर्नुभएको छ ।  भारत सरकारको आर्थिक सहयोग करिब नेरु. ३.८ करोड लागतमा यस विद्यालय भवनको निर्माण हुँदैछ । यो उच्च प्रभाव सामुदायिक विकास परियोजना मेल्लेख गाउँपालिका, अछाममार्फत कार्यान्वयन गरिनेछ । अछामको मेल्लेख गाउँपालिकाका अध्यक्ष तथा अन्य सरोकारवालाहरूले भारत सरकारद्वारा प्रदान गरिँदै आएको विकास सहयोगको प्रशंसा गर्नुभयो । वहाँहरुले नयाँ संरचनाले मेल्लेख गाउँपालिका, अछामका विद्यार्थी र शिक्षकहरूका लागि सिकाइको वातावरण सुदृढ बनाउन मद्दत पुग्ने विश्वास व्यक्त गर्नुभयो । नजिकका छिमेकीको रुपमा भारत र नेपालबीच व्यापक र बहुक्षेत्रीय सहकार्य रहँदै आएको छ । उच्च प्रभाव सामुदायिक विकास परियोजनाको कार्यान्वयनले प्राथमिकताका क्षेत्रहरुमा पूर्वाधार विकास गर्नुका साथै विकास र समृद्धिलाई अगाडि बढाउने नेपाल सरकारको प्रयासलाई सुदृढ पार्न भारत सरकारको निरन्तर सहयोगलाई प्रतिबिम्बित गर्दछ ।