चीनबाट ठुलाे परिमाणमा तस्करी भएकाे चिनियाँ इलेक्ट्रिक चुरोट (भेप) सहित तीन जना पक्राउ परेका छन् ।
पक्राउ पर्नेमा धादिङको धुनीबेशी नगरपालिका–१ बस्ने सन्तोष लामा तथा सिन्धुपाल्चोकको भोटेकोशी गाउँपालिका–२ का फुन्चुदोर्जे तामाङ र सोही गाउँपालिका–३ का पासाङ शेर्पा रहेका छन् ।
मुस्ताङ जिल्लाको लोमान्थाङ गाउँपालिका–४ स्थित एक्लेभट्टीबाट जेठ १ गते राति ५ सय ९० कार्टुन चिनियाँ इलेक्ट्रिक चुरोट (भेप) सहित विभिन्न सामान र दुई वटा कन्टेनरसहित तीन जनालाई नियन्त्रणमा लिइएको हो।
ना ६ ख ४७४३ र ना ५ ख ७९२१ नम्बरका कन्टेनरमा कोरोला नाकाहुँदै काठमाडौंतर्फ ल्याइँदै गरेको उक्त सामान सशस्त्र प्रहरी बल, नेपाल बोर्डर आउट पोष्ट नेचुङ, नेपाल प्रहरी र मुस्ताङ भन्सार कार्यालयको संयुक्त टोलीले बरामद गरेको हो ।
बरामद सामानमा इलेक्ट्रिक भेपसहित २ सय ५९ कार्टुन विभिन्न कम्पनीका जुत्ता, ८ बोरा मोजा, १५ बोरा लत्ताकपडा तथा १५ केजी खाली कार्टुन बक्स रहेको प्रहरीले जनाएको छ ।
नियन्त्रणमा लिइएका व्यक्तिहरूलाई आवश्यक कारबाहीका लागि नेपाल प्रहरीलाई बुझाइएको छ भने बरामद सामान मुस्ताङ भन्सार कार्यालयमा राखिएको छ ।
