
काठमाडौं । दक्षिण एसियाली क्षेत्रीय सहयोग संगठन (सार्क) का नवनियुक्त महासचिव सोनाम तोप्गेले पदभार ग्रहण गरेका छन् । भुटानका पूर्वगृहसचिव तथा पूर्व प्रमुख निर्वाचन आयुक्त तोप्गे मंगलबार काठमाडौं आइपुगेपछि त्रिदेवीमार्गस्थित सार्क सचिवालय पुगेर औपचारिक रूपमा कार्यभार सम्हालेका हुन् ।
तोप्गे मंगलबार दिउँसो ड्रुक एयर (रोयल भुटान एयरलाइन्स) को विमानबाट काठमाडौं आएका थिए । उनको विमान दिउँसो करिब १२ः४० बजे त्रिभुवन अन्तर्राष्ट्रिय विमानस्थलमा अवतरण गरेको थियो ।
विमानस्थलको विशिष्ट कक्षमा सार्कका कार्यवाहक महासचिव, सचिवालयका पाकिस्तानी निर्देशक, भारतीय निर्देशक भवेश त्रिपाठी तथा नेपाल परराष्ट्र मन्त्रालयका अधिकारीहरूले उनलाई स्वागत गरेका थिए । त्यस अवसरमा अधिकारीहरूले पुष्पगुच्छा प्रदान गर्दै नयाँ जिम्मेवारीका लागि बधाई तथा सफल कार्यकालको शुभकामना दिएका थिए ।
विमानस्थलमा स्वागतपछि उनी सार्क सचिवालय पुगेका थिए । त्यहाँ सचिवालयका विभिन्न विभागका अधिकारी तथा कर्मचारीले उनलाई स्वागत गरेका थिए । कर्मचारीहरूले स्वागत गरेपछि उनले सचिवालयका वरिष्ठ अधिकारीहरूसँग परिचयात्मक भेटघाट तथा छलफल गरेका थिए ।
उक्त भेटमा उनले सचिवालयको प्रशासनिक संरचना, संस्थागत गतिविधि र चालु जिम्मेवारीबारे जानकारी लिएका थिए ।
नवनियुक्त महासचिव तोप्गेसँग भुटानको सार्वजनिक प्रशासन र संस्थागत नेतृत्वको लामो अनुभव छ । सार्क महासचिव नियुक्त हुनुअघि उनले भुटानको शाही सरकारमा गृहसचिवको जिम्मेवारी सम्हालेका थिए । गृहसचिवको कार्यकाल पूरा गरेपछि उनी भुटानको प्रमुख निर्वाचन आयुक्त नियुक्त भएका थिए । निर्वाचन प्रशासनसम्बन्धी महत्वपूर्ण जिम्मेवारी पूरा गरेपछि उनी अवकाशमा गएका थिए ।
गृह प्रशासन, सुशासन र निर्वाचन व्यवस्थापनमा हासिल गरेको उनको अनुभवलाई सार्कको क्षेत्रीय कूटनीतिक भूमिकामा उपयोगी मानिएको छ ।
सार्कको महासचिवका रूपमा उनले संगठनको सचिवालयको नेतृत्व गर्नुका साथै सदस्य राष्ट्रहरूबीच क्षेत्रीय सहकार्य प्रवर्द्धन गर्ने संस्थागत गतिविधिको समन्वय गर्नेछन् ।
सन् १९८५ मा स्थापना भएको सार्कमा नेपाल, भारत, भुटान, बंगलादेश, पाकिस्तान, श्रीलंका, माल्दिभ्स र अफगानिस्तान गरी आठ सदस्य राष्ट्र छन् । क्षेत्रीय आर्थिक विकास, सामाजिक प्रगति, सांस्कृतिक आदानप्रदान र आपसी समझदारी अभिवृद्धि गर्नु संगठनको मुख्य उद्देश्य हो ।
दक्षिण एसियामा व्यापार, पर्यटन, शिक्षा, यातायात तथा क्षेत्रीय सम्पर्क सञ्जाल, जलवायु परिवर्तन र आर्थिक विकासका क्षेत्रमा सहकार्यको आवश्यकता बढिरहेका बेला तोप्गेले महासचिवको जिम्मेवारी सम्हालेका हुन् ।

सार्कको सचिवालय काठमाडौंमा रहेकाले नयाँ महासचिवको आगमन र पदभार ग्रहण नेपालको क्षेत्रीय कूटनीतिक संलग्नताका दृष्टिले पनि महत्वपूर्ण छ । सदस्य राष्ट्रहरूबीच संवाद र सहकार्यलाई निरन्तरता दिन तथा संगठनका संस्थागत गतिविधिलाई प्रभावकारी बनाउन उनको भूमिका महत्वपूर्ण हुने अपेक्षा गरिएको छ ।
सार्कका सदस्य राष्ट्रहरूबीच पछिल्ला वर्षमा देखिएका विभिन्न राजनीतिक तथा कूटनीतिक चुनौतीका बाबजुद क्षेत्रीय सहकार्यको साझा उद्देश्यलाई अघि बढाउनु नयाँ महासचिवका लागि प्रमुख जिम्मेवारी हुनेछ ।





























