काठमाडौं। नेकपा माओवादी केन्द्र कोशी प्रदेश संसदीय दलले कोशीका पूर्वमन्त्री लिलाबल्लभ अधिकारीमाथि गम्भीर छानबिन गर्न माग गरेको छ । माओवादी केन्द्र कोशी प्रदेश संसदीय दलकी प्रमुख सचेतक गीता तिम्सिनाले बिहीबार एक विज्ञप्ति जारी गर्दै प्रदेश र देशकै स्वाभिमान गिराउने मानव तस्करी तथा सरकारी कागजात किर्तेलगायतको विषयमा गम्भीर छानबिनको लागि सरकारको ध्यानाकर्षण गराएकी हुन् ।
कोशी प्रदेशका पूर्वआन्तरिक मामिला तथा कानुनमन्त्री अधिकारीको जापान भ्रमण विवाद भएपछि उनले बुधबार राजीनामा दिएका थिए ।
विज्ञप्तिमा भनिएको छ, ‘मन्त्रीसँगै गएका व्यक्तिहरूसँग मन्त्रालयकै कर्मचारीको नक्कली परिचयपत्र हुनु, त्यही परिचयपत्रको आधारमा उ कार्यक्रममा सहभागी हुन मन्त्री र ती व्यक्तिहरूको भिसासहित हवाईटिकको प्रबन्ध हुनु रहस्यमयी देखिएको छ । जिम्मेवार सरकारी कर्मचारीले मन्त्रीलाई आएको भनिएको निम्ताप्रति नै प्रश्न उठाउँदै विदेश नजान दिएको सुझाव मन्त्रीले अस्वीकार गर्नु र नेपालबाट जापानमा सिधै उडान भएपनि हङकङ ट्राञ्जिट भएको उडान प्रयोग गर्नुले यो प्रकरण गम्भीर लापरबाही मात्र नभएर उच्चपदस्त व्यक्तिहरूको मिलेमतो र योजनामा भएको नक्कली भुटानी शरणार्थी प्रकरणजस्तै मानव तस्करी प्रकरण त हैन भन्ने आशंका पैदा भएको छ ।’
माओवादी केन्द्रले नेपाली कांग्रेस र एमालेको गठबन्धन माफिया, भ्रष्ट, दलाल तथा गलत धन्दा चलाउने गिरोहको संरक्षणको लागि बनेको तथ्यलाई यो प्रकरणले उजागर गरेको जनाएको छ ।
