सुर्खेत। कर्णालीका मुख्यमन्त्री यामलाल कँडेलले कर्णालीका आर्थिक, धार्मिक र सांस्कृतिक दृष्टिले उत्तर र दक्षिण व्यापारको ढोका कर्णालीमै भएको बताएका छन् ।
मुख्यमन्त्री कँडेलले कर्णाली उत्सवको यो छैठौंँ संस्करण उद्घाटन गर्दै कर्णालीका हरेक जिल्लामा सम्भावनाका प्रशस्त आधार रहेको बताएका हुन् ।
कर्णालीले मानसरोवर एवम् मध्यएसिया पुग्ने सिल्क रोडलाई प्रतिनिधित्व गर्ने गरेको मुख्यमन्त्री कँडेलले बताए ।
‘हिमाल, पहाड, नदी, वनजंगल, कृषि भूमिलगायत औषधिजन्य उत्पादनको सम्भावना कर्णालीमै छ,’ उनले भने, ‘मानसरोवर मार्ग, फोक्सुण्डोलगायत सांस्कृतिक र प्राकृतिक भूमिहरूले कर्णालीलाई राष्ट्रिय मात्र होइन अन्तर्राष्ट्रिय पहिचान बढाएका मद्दत गरेका छन् । कर्णालीको पानी र जडीबुटी संसारकै उत्कृष्ट छ ।’
कर्णाली बोल्नासाथ हाम्रो जनजिब्रोमा झुन्डिएको र कर्णालीवासीले मन पराएको कर्नालीलाई सम्झने र मनन गर्ने र एक पटक पुगेर अनुभव गर्ने भन्ने जो सुकैको मनमा लाग्ने गरेको मुख्यमन्त्री कँडेलले बताए ।
‘कर्णाली एउटा सभ्यता हो । ठूला–ठूला शहरको मानव सभ्यताको विकास नदीसँग जोडिएको हुन्छ,’ उनले भने,‘एथेन्स वा रोमन सभ्यता नै किन नहोस् नदीसँंग जोडिन्छ । यस्तै नेपालको पुरानो सभ्यता कर्णाली हो र यो कर्णाली नदीसँग जोडिएको छ । कर्णालीको सभ्यता मानव सभ्यता र संस्कृतिसँग जोडिएको छ ।’
कर्णाली प्रदेश मुलुककै एक अनुपम क्षेत्र भएको र जहाँ सम्भावनाले अवसर दिएको मुख्यमन्त्री कँडेलले बताए ।
‘कर्णाली सभ्यता र इतिहासका दृष्टिले वैभवशाली छ । भाषा, सभ्यता र संस्कृतिका रूपमा यहाँका भूभाग ऐतिहासिक छन्,’ उनले भने,‘नेपाली भाषाको उद्गम स्थलका रूपमा जुम्लाको सिञ्जा हाम्रो गौरव र पहिचान हो । नेपाली भाषा, सभ्यता, संस्कृति सिञ्जाबाटै सुरु भएकाले कर्णालीलाई विश्वभरका नेपाली भाषीले आफ्नो उद्गम थलोकै रूपमा स्विकार्ने गर्छन् ।’
