काठमाडौं। इथियोपियाको राष्ट्रिय राजमार्गमा भएको ट्रक दुर्घटनामा ७१ जनाको मृत्यु भएको छ । दक्षिणी इथियोपियामा यात्रुले भरिएको ट्रक नदीमा खस्दा कम्तीमा ७१ जनाको मृत्यु भएको स्थानीय सञ्चारमाध्यमले जनाएका छन् ।
मृत्यु हुनेमा ६८ पुरुष र तीन महिला छन् । दुर्घटनामा पाँच जना गम्भीर घाइते भएको र स्थानीय बोना जनरल अस्पतालमा उपचार भइरहेको बताइएको छ ।
राजधानी अदिस अबाबाबाट करिब ३ सय किलोमिटर टाढा सिदामा राज्यको बोना जुरिया वोरेडास्थित गेलाना ब्रिजको पूर्वी भागमा दुर्घटना भएको हो ।
पुल पार हुनुअघि नै ट्रक नदीमा खसेको बताइएको छ । ट्रक नदीमा खसेपछि स्थानीयले केहीको उद्धार गरेका छन् । तर ७१ जनाको भने मृत्यु भएको हो ।
