काठमाडौं। इजरायलका प्रधानमन्त्री बेन्जामिन नेतन्याहूले हिजबुल्लाहलक्षित ‘पेजर विस्फोट’ इजरायलले गराएको स्वीकार गरेका छन्।
पेजर विस्फोट गराएको आरोप लगाइए पनि यसअघि इजरायलले कुनै औपचरिक प्रतिक्रिया जनाएको थिएन । इजरायली सञ्चारमाध्यमहरुले नेतन्याहूलाई उदृत गर्दै पहिलो पटक स्वीकार गरेको जनाएका छन् ।
नेतन्याहूले हिजबुल्लाह नेता हसन नसरल्लाहको मृत्युमा पनि इजरायल जिम्मेवार रहेको स्वीकार गरे । सुरक्षा अधिकारीहरुको विरोधका बाबजुद आफ्नो निर्देशनमा यी दुवै आक्रमण भएको नेतन्याहूको भनाइ छ ।
इजरायलले पहिलो पटक आधिकारिक रूपमा दुवै आक्रमणको जिम्मेवारी स्वीकार गरेको हो । नेतन्याहूले आक्रमणको विरोधमा इजरायली पूर्वरक्षामन्त्री योभ ग्लान्ट पनि रहेको बताए । रक्षामन्त्री ग्लान्टसँग तिक्तिता बढेपछि नेतान्याहु नोभेम्बर ५ मा पदबाट बर्खास्त गरेका थिए ।
यसैबीच, नवनिर्वाचित अमेरिकी राष्ट्रपति डनल्ड ट्रम्पसँग दुवै देशबीचको सम्बन्धलाई थप मजबुत बनाउन आफूले तीनपटक फोनमा कुरा गरेको नेतन्याहूले खुलासा गरे । फोनवार्ता निकै अर्थपूर्ण रहेको बताउँदै नेतन्याहूले इरान प्रतिको दृष्टिकोणमा दुवै नेताको फरक मत नरहेको स्पष्ट दाबी गरे ।
इजरायली सेनाले भने गाजा र लेबनानमा आफ्नो आक्रमणलाई जारी राखेको छ । गाजामा पछिल्लो आक्रमणमा ३० जनाको मृत्यु भएको त्यहाँको नागरिक सुरक्षा एजेन्सीले जनाएको छ । त्यस्तै लेबनानमा इजरायली सेनाको आक्रमणबाट २३ जनाको मृत्यु भएको र त्यसमध्ये ७ जना बालबालिका रहेको त्यहाँको स्वास्थ्य मन्त्रालयले जनाएको छ ।
