काठमाडौं। भारतमा आजदेखि शुरु भएको संसदको हिउँदे सत्र प्रधानमन्त्री नरेन्द्र मोदीनिकट अर्बपति व्यवसायी गौतम अडानीमाथिको घुसखोरी अभियोगमा बहस गर्ने–नगर्ने विषयमा विवाद बढेपछि एक घण्टा पनि नचली स्थगित भएको छ ।
माथिल्लो सदन राज्यसभाका अध्यक्ष तथा उपराष्ट्रपति जगदीप धनखडले अडानी मामिलामा छलफलका लागि आफूले १३ वटा सूचना पाए पनि नियम संगत नभएकाले छलफल अगाडि नबढाउने बताउनु भएको थियो । लगत्तै विपक्षी इण्डिया गठबन्धनका नेता तथा कांग्रेस अध्यक्ष मल्लिकार्जुन खरगेले सो विषयमा छलफल गराउन माग गर्नु भएको थियो । तर अध्यक्ष धनगढले सो विषयमा बोल्न नदिने बताएपछि केही सांसदहरुले विरोधमा नाराबाजी गरेका थिए । त्यसपछि अध्यक्ष धनखडले शुरुमा केही समयका लागि र पछि गएर पर्सी पुनः बस्ने गरी सदन स्थगित गर्नुभएको थियो ।
उता संसदको तल्लो सदन लोकसभामा पनि यस्तै विवाद भएपछि सभामुखले सदन स्थगित भएको घोषणा गर्नुभएको थियो । दुवै सदनको बैठक अब बुधवार बस्नेछ । भारतमा विपक्षी दलहरुले धेरै अघिदेखि नै मोदी सरकारमाथि अडानी र उनको व्यवसायलाई संरक्षण राखेको आरोप लगाउँदै आएका छन् ।
गत साता अमेरिकाको न्युयोर्कमा अडानी र उनका भतिजा सागर अडानी सहितका सात जनामाथि सौर्य उर्जा परियोजना निर्माणको ठेक्का हात पार्न सरकारी अधिकारीहरुलाई साढे २६करोड अमेरिकी डलर घुस दिन सहमति जनाएको अभियोगमा मुद्दा दर्ता गरिएको थियो । अडानीमाथि लगाइएको उक्त आरोपको विषयमा भारत सरकारले केही टिप्पणी गरेको छैन भने भाजपाले भने यसको सामना र प्रतिरक्षा गर्ने काम अडानी समूहको भएको जनाएको छ ।
संघीय अभियोजकहरुले अडानी र उनका भतिजा सागरविरुद्ध अरेष्ट वारन्ट जारी गरिसकेका छन् भने अमेरिकी धितोपत्र तथा विनिमय आयोगले पनि २१ दिने सम्मन जारी गरिसकेको छ । अडानीविरुद्ध मुद्दा परेपछि उनका कम्पनीका शेयरमूल्यमा भारी गिरावट आएको छ भने शेयरको बजार मूल्य अरबौं डलर घटेको रोयटर्सले उल्लेख गरेको छ।
