काठमाडौं। नेपाल प्रिमियर लिग फ्रेन्चाइज टोली जनकपुर बोल्ट्सले पुबुदु दसानायकेलाई मुख्य प्रशिक्षकमा नियुक्त गरेको छ ।
राष्ट्रिय क्रिकेट टोलीका विकेटकिपर ब्याटर आसिफ शेख मार्की खेलाडी रहेको जनकपुरले सामाजिक सञ्जालमार्फत पुबुदुलाई मुख्य प्रशिक्षकको जिम्मेवारी दिइएको जानकारी गराएको हो । पुबुदुले फेरि एकपटक नेपाल आउन पाउँदा उत्साहित भएको बताएका छन् ।
नेपाली राष्ट्रिय क्रिकेट टोलीका पूर्व मुख्य प्रशिक्षक रहेका पुबुदुसँग नेपाल र क्यानडालाई दुई पटक र एक पटक अमेरिकी राष्ट्रिय टिमको प्रशिक्षाको जिम्मेवमारी सम्हालेको अनुभव छ । श्रीलंकाली मुलका क्यानडियन नागरिक पुबुदुको प्रशिक्षणमा नेपालले पहिलो पटक सन् २०१४ मा टी–२० विश्वकप खेलेको थियो ।
५४ वर्षीय पुबुदुकै प्रशिक्षणमा क्यानडाले एकदिवसीय मान्यता पाउनुका साथै टी–२० विश्वकप खेलेको थियो भने अमेरिकाले समेत पहिलो पटक एकदिवसीय मान्यता पाएको थियो । श्रीलंका र क्यानडा दुवै देशबाट त्रिकेट खेलेका पूर्व विकेटकिपर ब्याटर पुबुदु नेपालको कन्डिसनबारे राम्रो सँग जानकार छन् ।
पहिलो संस्करणको एनपीएल मंसिर १५ गतेदेखि पुस ६ गतेसम्म टीयू क्रिकेट मैदानमा हुनेछ ।
